SARIBAS, 23 Jan: Pemansang projek ngaga Jematan Batang Saribas mandangka pengerembai ke positif ke alai dipelabaka tembu enggau dibuka lebih tumu ari perambu asal.
Sapit Menteri Infrastruktur Enggau Pemansang Penyangkai Kapal Datuk Aidel Lariwoo madahka jematan ke nguna kos RM375.5 juta tu dipelaba tembu kena March 2025 enti dibanding permabu asal kena mei taun tu.
“Pemansang projek tu (Jematan Batang Saribas 1) manggai 51 peratus ke alai tu nitihka timpuh ditetapka.
“Jematan Batang Saribas mega nitihka timpuh ke ditetapka. Kitai nguji muka dulu ambi nadai sebedau Hari Raya Aidilfitri.
“Abis nadai ba sepiak tunga ke Pusa ulih ditembuka sebedau Raya tu. Ngarapka ulih tembu sebedau Hari Raya ngambika senang ditengah ba ditu,”ku iya.
Iya mansutka jaku nya rambau pengawa nyambung kepenudi Jematan Batang Saribas, kemari.
Aidel ke ngarika Sapit Premier Sarawak Datuk Amar Douglas Uggah Embas madah agi, taja pan pemansang projek nya baka ke diperambu tan raban iya tetap betapi enggau mayuh pemar.
“Ba ditu tanah enda entu tegap enggau bela. Nya alai penalam endur tu iya nya lebih 80 meter. Tu mandangka pemar ari sukut geologi gaya tanah.
“Tang tu ulih dikemansangka enggau chara pemadu baru sereta pengelandik raban kunteriktor ti ngaga jematan ba tanah lembut ba endur tu,”ku iya.
Jematan Batang Saribas nyadi siti ari komponen beguna bendar dalam Projek Jalai Pesisir Sarawak.
Projek tu ngaul pengawa ngaga jematan pemanjai 1.55 kilometer enggau pejalai dua arung, jalai baru, sereta pengawa ngangkatmanah jalai ke bisi diatu ba kedua-dua endur di Pusa enggau Beladin.
Tuju projek tu digaga iya nya dikena nambahka bungkur akses jalai ba ditu nganti servis feri enggau ngenyampatka pejalai entara pusa enggau Beladin.
Projek tu mega nyadi jalai alternatif ungkup Jalai Besai Pan Borneo sereta meri akses ke lebih manah ngagai perayat lokal ngagai sekula, klinik, septial enggau opis perintah seraya meransang pemansang ekonomi sereta nambahka tikas pengidup komuniti lokal.-TVS
