BETONG, 23 Jan: Semua Komiti Pemansang enggau Pengelikun Genturung Pendiau (JKKK) lebih agi ba sitak Kunsil Nengeri (DUN) Engkilili ke udah dikemendarka bulih agih nengag Program Sejahtera Komuniti Madani (Sejati Madani) dilalau patut nguna agih belanja nya enggau manah.
Kaban Kunsil Nengeri (ADUN) Engkilili Dr Johnical Rayong Ngipa madah, nya endang beguna amat dikena nentuka agih belanja nya tau meri pemaik ngagai nembiak redak dibaruh JKKK nya empu.
“Nyadi aku arapka agih belanja ke diberi nya ulih dikena enggau chukup manah lebih agi ngangkatka ekonomi.
“Nama utai ke patut diatur kitai ba rumah panjai awak ulih ngemansangka rumah panjai kitai sereta nembiak kitai tauka pasal pekara rama.
“Nyadi sapa kitai ke bedau bulih aku ngarapka kitai ulih minta tauka betanya ba Palan Servis aku (DUN) Engkilili tauka ari Opis Pelilih,” ku iya.
Iya manstutka jaku nya rambau dirandau media pengudah program kelai nyuaka replika chek Sejata Madani Pelilih Betong 2025 ba Dewan Layar Opis Pelilih Betong empai lama.
Nya alai, iya meri terima kasih ngagai perintah besai laban udah ngemendarka urung RM300,000 ungkup empat JKKK di DUN Engkilili naka tu.
Tandu iya, arapka udah tu ila mayuh agi JKKK di DUN Engkilili ngaga peminta awak tau bulih agih belanja ke sama.
Pengawa kelai nyuaka chek nya dikemujurka Sapit Premier Sarawak, Datuk Amar Douglas Uggah Embas.
Bisi RM2.75 juta udah disuaka ngagai 28 JKKK di pelilih Betong nyengkaum sekeda sitak ari DUN Engkilili.
Sama bisi datai Kaban Parlimen Betong, Dato Dr Richard Rapu, Pegawai Pelilih Betong, Laga Kueh, Pegawai Bekuasa Pelilih Mit Debak enggau Spaoh, Mohammad Khairurani Muhammad Ibrahim sereta ke bukai.
Ke penerang, bisi 182 buah rumah panjai dibaruh pegai sitak DUN Engkilili.-TVS
