SIBU, 12 Jan: Perintah Sarawak benung ngemujurka projek pemansang infrastruktur iya nya ngaga jalai raya baru di Sibu ti besambungka menua Teku Pasai Siong enggau Desa Kemuyang.
Premier Sarawak, Datuk Patinggi Tan Sri Abang Johari Tun Openg madahka, nengah kerejasama raban bekuasa lokal enggau penyanding penemu teknikal, projek nya mujur dipejalaika ngena teknologi moden baka ‘Building Information Modelling’ (BIM) enggau konsep jalai beringkat.
“Tanah kerapa nya keterubah iya murah endur ngaga jalai alun, tang pengudah tiga taun, tanah nya berengkah nurun sereta merekah ngujungka kos pengawa nyeruri nyadi tinggi. Nya alai, aku merambu chara mutarka penanggul baru ngena jalai beringkat (elevated roads).
“Diatu, teknologi baka Building Information Modeling (BIM) ulih dikena dalam pengawa ngaga tu. Nengah BIM, kitai ulih ngena turai tukuh tukuh 3D dikena ngaga analisis kos , nentuka jalai alun tegap agi sereta ngemuntangka proses ngemanah tauka masang perengka guna baka karan enggau ai. Semua data disimpan dalam sistem ti berurun ngambika iya muntang diakses ungkup guna jemah,” ku iya.
Iya mansutka pekara nya rambau Pengerami Nasih Tanah Projek Jalai Teku Pasai Siong-Kemuyang Sibu, kemari.
Tandu iya, jalai baru nya mega ulih nyadi peyungkak ngagai pemansang kandang menua kemunyang nengah chara meri akses ke muntang ngagai sepital, universiti enggau genturung pendiau.
Projek nya dipejalaika enggau agih belanja sepenyampau RM89 juta, lalu jalai sepemanjai tujuh kilometer nya dipelabaka ulih ngurangka timpuh pejalai entara kededua kandang endur nya ari setengan jam nyadi tujuh minit aja.
Ba awak ke sama Abang Johari mega bisi ngelansa senentang perambu timpuh panjai ti komprehensif dikena mutarka penanggul ampuh bah di Sibu.
“Bisi kandang endur diperambu deka dikemansang nyadi sebagi ari pelin besai pemansang Sibu. Perambu tu beguna amat dikena mutarka penanggul ampuh bah ti suah nyadi tiap kali ujan, nyerangkung isu ai ngelumpa ba parit besai.
“Nya alai, chara mutarka timpuh panjai patut diperambu, ngaul raban tebangkar dikena merambu pengawa pemansang baru (redevelopment) mengeri Sibu,” ku iya.
Sama bisi datai, Sapit Premier Sarawak Datuk Amar Douglas Uggah Embas, Sekretari Perintah Nengeri Sarawak, Datuk Amar Mohamad Abu Bakar Marzuki, Sapit Menteri ba Opis Premier Sarawak (Undang-Undang, Sempekat Malaysia 1963 enggau Kaul Nengeri-Perintah Besai) Datuk Sharifah Hasidah Sayeed Aman Ghazali Sapit Menteri Infrastruktur enggau Pemansang Penyangkai Kapal Sarawak (Pemansang Infrastruktur) Datuk Aidel Lariwoo.-TVS
