SIBU, 12 Jan: Sibu deka nyadi kandang menua keterubah di Sarawak bisi jalai raya beringkat tauka “elevated road” dikena ngemanahka akses pengangkut darat ungkup peranak ba kandang menua nya.
Sapit Premier Sarawak, Datuk Amar Douglas Uggah Embas madahka , projek ngaga jalai alun ti nyambung Jalai Pasai Siong enggau Kemuyang nya meri reti ti besai ngagai rayat Sibu tebal agi ngagai peranak Kemuyang, lalu dianggarka nelan kos sepenyampau RM89 juta.
“Skop projek tu iya nya ngaga jalai alun biasa, tang utai ke pemadu manah iya nya, sepemanjai 700 meter jalai nya iya nya jalai alun beringkat ti keterubah di Sarawak. Pengawa dikena ngaga jalai beringkat ya udah nyadi nyata sehari tu,” ku iya.
Uggah nyemetak madahka, jalai nya mega digaga ngena teknologi baru dikena nentuka jalai nya entap, iya nya nengah chara Building Information Modelling (BIM) .
“Sibu ngembuan mayuh kandang endur, nyadi kitai patut berundingka chara baru iya nya ngaga jalai alun beringkat. Ambika chunto, lebuh deriba ari padang bilun Sibu ngagai mengeri, pejalai berasai chukup lama. Suba kitai gaga laban udah bisi jalai alun, tang diatu udah maya kitai patut nelebaka diri enggau teknologi baru.
“Kitai (perintah) merambu program ungkup Premier Sarawak, Datuk Patinggi Tan Sri Abang Johari Tun Openg dikena ngabas ngagai menua luar sereta belajar pasal struktur, teknologi lalu ke pemadu beguna, iya nya ngurangka setengah kos enti dibandingka enggau chara mutar ke diatu, ” ku iya.
Iya mansutka pekara nya rambau Pengerami Nasih Tanah Projek Jalai Teku Pasai Siong-Kemuyang, ditu kemari.
Dulu ari nya, Premier Sarawak, Datuk Patinggi Tan Sri Abang Johari Tun Openg, nengah jaku iya madahka , pengawa ngaga projek jalai raya ti ngena chara BIM enggau jalai beringkat nya beguna amat laban digaga ba atas tanah kerapa ti dikumbai mudah merekah, lalu begunaka kos ti chukup tinggi.
Ku iya, chara tu ulih nentuka jalai raya digaga tegap agi, sereta ngemudahka proses ngemanah tauka masang perengka guna enggau kuasa karan.
Ungkup rikod, sepenyampau 17 projek jalai alun di Sibu enggau agih belanja RM826 juta udah dikemendar ba baruh Atur Pemansang Malaysia Lumpar ke-12 (RMK-12).-TVS
