SIBU, 11 Jan: Perintah Sarawak enggau perintah besai nengah Komisyen Komunikasyen enggau Multimedia Malaysia (MCMC) komited negapka literasi digital rayat di menua pesisir enggau penumbuh Palan Sebar Penerang Nasional (NADI).
Menteri Utiliti enggau Telekomunikasyen Sarawak, Dato Sri Julaihi Narawi madahka 23 palan NADI baru udah beoperasyen di selampur Sarawak nyengkaum tiga di Sibu.
“Nyadi tadi kami meda bisi program benung dipejalaika NADI.
“Entara iya meri penemu pasal inisiatif ti dipejalaika perintah enggau penerang bukai ke beguna ti dipejalaika perintah (Sarawak) enggau perintah Malaysia ba renggat Perintah Besai tauka Perintah Sarawak ngambika ulih dipereti rayat di serata menua tauka di selampur Sarawak, tebal agi rayat ba kandang menua pesisir,” ku iya.
Iya madah munyi nya  rambau aum media sepengudah bejadika Palan NADI, Teku ditu, kemari.
Ba awakka sama, Â iya mega bisi nemuai ngagai palan NADI Pelawan enggau NADI Salim.
Penemuai nya disempulang Sapit Menteri Utiliti enggau Telekomunikasyen, Datuk Dr Abdul Rahman Junaidi, enggau Kaban Kunsil Nengeri (ADUN) Pelawan, Michael Tiang Ming Tee.
Tandu  Julaihi , komuniti lokal mega udah berengkah ngayanka pengerindu deka nyereta NADI.
“Nyadi entara pesereta ke berejista, ba NADI Teku, 60 peratus nembiak, 40 peratus ari komuniti lokal. Tu mandangka nembiak udah bisi akses ngagai perengkaguna ti disediaka NADI.
“Kelimpah ari nya, kami mega tetemuka bisi peranak lokal bisi ngayanka pengerindu ngagai NADI,” ku iya.
Nangkan ke nya, Â iya mega meransang bala nembiak kelebih agi ari ruang bilik B-40 ngambika ngerejista diri nyadi kaban komuniti nadi sereta beambi ulih ari perengka guna ICT ke bisi disediaka.
Naka ke diatu, bisi 156 palan nadi udah beoperasyen di selampur Sarawak ti  ngayanka komitmen perintah dalam negapka literasi digital.-TVS
