MIRI, 11 Jan: Sarawak dikelala nyadi sebuah nengeri ti nyelai beduduk ari pemisi diuan rayat pupu bansa, budaya enggau pengarap lalu penyelai nya dirami begulai dalam penuh pengelantang.
Menteri Pengangkut Sarawak, Dato Sri Lee Kim Shin madahka, enda ngira penatai, tetiap pengerami besai di wilayah tu diintu enggau semangat baka diri sebilik.
Ku iya, tu mandangka penegap penyerakup komuniti pupu bansa enggau jalai pengarap di nengeri tu.
“Kitai baka siti ruang bilik besai ti ngerami bida nyadika penegap. Tu identiti komuniti Sarawak ti patut ditanka kitai,” ku iya rambau Pengerami Makai Lemai Apresiasyen Taun Baru China ditu kemari.
Tandu iya, nengah pengawa begulai, peranak Sarawak ukai semina ulih ngerami bida, tang mega mandangka ngagai dunya komuniti ti mayuh macham nyadi aset.
“Aku mega deka ngemeratka penegap kitai di Sarawak iya nya dalam penyerakup sereta penyelai.
“Aku temegah ati laban ulih bekunsika semangat pengerami tu enggau komuniti lokal (Sarawak). Penatai nembiak mit ari rumah pengintu pengelantang nyadi pengawa kami nentuka semua orang enda ngira penatai ulih ngasaika pengerami Taun Baru China,” ku iya.
Pengerami tu mega dirichah enggau pengawa mandangka tanda singa ti ngalitka ati sereta pengawa pemandang budaya ke meri kelala main asal komuniti china.
Bisi 12 iku anak mit ari Miri Methodist Children’s home datai ngulu pengerami nya.-TVS
