KUCHING, 11 Jan: Pemansang ke benung dipejalaika deka nempa Sarawak nyadi entara wilayah ke pemadu maju di Malaysia dalam timpuh beberapa taun ti deka datai.
Sapit Premier Sarawak, Datuk Amar Dr. Sim Kui Hian andal, Sarawak ukai semina ulih ngagai Pulau Pinang enggau Selangor ari sukut pemansang, tang enda lama agi deka ngelih sida.
“Setaun bajet Sarawak sebaka enggau 15 taun belanja perintah Pulau Pinang. Kitai jauh di belakang, nadai pengakang pasal nya. Tang, dua taun bajet Sarawak sama enggau 30 taun belanja Pulau Pinang. Setaun bajet Sarawak sebaka enggau lima taun bajet Sarawak.
“Dua taun bajet Sarawak sebaka enggau 10 taun bajet Selangor.
“Nya alai, anang ngumbai udah empat tauka lima taun, kitai enda ulih ngagai Selangor. Kitai ukai semina deka ngagai, kitai deka ngelui sida. Aku meri jamin ngagai pekara iya,” ku iya ba Pengerami Makai Lemai Begulai Enggau Media di Kuching, malam tadi.
Ku iya, Pulau Pinang begunaka timpuh 60 taun  dikena nyapai utai ke dijapai Sarawak dalam timpuh empat taun.
Dalam jaku ke sama, iya mega minta penyerakup enggau komitmen ari rayat Sarawak dikena napi pemar ke deka datai.
“Enti kita sayauka Sarawak, kita patut angkat sereta meri bantu ngagai pengawa tu, sebaka enggau ex-Kepala Menteri Sarawak, niang Pehin Sri Adenan Satem enggau Premier Sarawak Datuk Patinggi Tan Sri Abang Johari Tun Openg,” ku iya.-TVS
