KUCHING, 11 Jan: Sapit Premier Sarawak, Datuk Amar Dr. Sim Kui Hian madahka, Teknologi Pemintar Artifisyel (AI) enggau ‘deepfake’ ulih meri empas ke besai ngagai chara orang nerima sereta meretika penerang.
Nya alai, ku iya, kuing Sarawak jemah ila ukai semina bepanggai ba teknologi enggau inovasyen, tang mega ba pemereti raban media dalam bejalaika tanggungpengawa.
“Ambika chunto, aku semina nguji nyual sesebengkah produk, tang enti enda meretika pengawa Pemintar Artifisyel (AI) enggau ‘deepfakes’, orang engka nerangka utai nya enggau chara ti bebida.
“Nya kebuah beguna amat platform media rama bejalaika tanggung pengawa enggau manah,” ku iya.
Tandu iya, mensia mayuh patut sedarka utai ke dipeda sereta dikunsi sida, dikena nentuka individu betanggungjawap dalam jeman digital tu.
Dr Sim mega ngelansa senentang sebengkah tabur nengah laman Facebook iya bekaul video ‘deepfake’ ti ngena imej enggau nyawa tiru iya dikena ngelakuka produk ngubat arthritis pelesu kena Hari Empat tu tadi.
“Baru beberapa hari ke udah, bisi orang mantaika video interbiu ke digaga aku enggau TV Sarawak (TVS) dalam taun 2020.
“Aku enda tentu nemu baka ni sida mujur ngereja nya, tang dalam video nya, aku benung ngelakuka sesebengkah produk lalu bisi 34,000 iku orang meda (video) nya,” ku iya.
Video nya mega bisi ngayanka iya empu enggau penanyi tebilang menua, Jaclyn Victor ke bekunsika testimoni pasal produk ti ulih ngubat penyakit arthritis.
Dalam jaku ke sama, Dr. Sim nyemetak madahka, kuing Sarawak jemah ukai semina bepanggai ba teknologi enggau inovasyen, tang mega ba pengawa media ti mereti.
Nya alai, ku iya, pengemeran media kemaya hari tu mesti ngereja mayuh agi pengawa ngambika ulih ngereja pengawa enggau jampat sereta profesional.-TVS
