KAPIT, 10 Jan: Lebih 2,000 perayat ari lima buah rumah panjai ba sekeda genturung pendiau di Baleh deka ngasaika pemaik pengudah projek jalai baru Jematan Baleh tembu kena April 2027 ila.
Menteri Kereja Raya, Datuk Seri Alexander Nanta Linggi madahka projek ngaga jalai sepemanjai tujuh kilometer ngaul dua buah jematan nya nguna kos kira-kira RM70 juta ke ditender baru ungkup dipejalaika kunteriktor ke baru berindik ari kunteriktor asal udah diketuka kunterik.
Pengawa nasih tanah jalai baru Jematan Baleh ngaul Rumah Belaja Nanga Benin, SK Nanga Pelagus enggau Pelagus Resort ba Baruh Upper Rajang Development Agency (URDA) Renggat 1, Seksyen 1 udah diatur pagi tadi.
Taja pan, pemanjai ngaga jalai bagi projek tu pandak tang begunaka turu ke besai lalu timpuh diguna iya nya pengelama tiga taun laban gaya tanah ke mar.
“Jalai tu deka meri pemaik ngagai lima buah rumah panjai tauka genturung pendiau ke alai endur tu di menua ulu sereta nadai jalai penyambung kelimpah ari nguna jalai balak.
“Nya alai, penembu projek tu ila deka ngenapka projek-projek ke bukai ti benung ditembuka,”ku iya.
“Baka ke suah dipadahka aku sebedau tu, aku deka ngelalau kunteriktor ke dichiri ngambi nembuka projek enggau manah dalam timpuh ke ditetapka enggau seliahka ari minta ngelanjarka timpuh ila ke alai tu mega mantu ngelimat finansial perintah,”ku iya.
Nanta ke mega Kaban Parlimen Kapit mega deka nentuka sekeda agi projek ngaga infrastruktur enggau jalai ba baruh URDA bulih turu ke patut dikena nembuka bungkur jalai ba endur tu.
“Endur tu jauh mimit ba sitak P215 ke alai mayuh jeram baka Wong Pelagus, baka ke dipeda kitai bisi sungai tu ke alai bisi siti agi jalai benung digaga Opis Menteri Pemansang Tumpuk Pendiau enggau Wilayah.
“Tu benung dipejalaika ke alai projek tu beguna bendar laban meri jalai penyambung ngagai endur ke besai sereta menua ulu.
“Jalai tu deka tembu dalam dua tiga taun agi lalu deka digaga rembus ngagai pelilih Kapit enggau Belaga,”ku iya.
Pia mega, Nanta pechaya sekeda projek agi benung mujur ditembuka dalam timpuh dua tauka tiga taun lalu tu meri pemaik ngagai semua perayat ari Kapit nyentuk ke Belaga.
Sama bisi datai ba pengawa nasih tanah nya iya nya Kaban Kunsil Nengeri (ADUN) Pelagus Wilson Nyabong Ijang sereta ke bukai.-TVS
