SRI AMAN, 10 Jan: Raban nembiak nyadi reta ke chukup berega ngagai sesebengkah sekula di menua tu, ku Datuk Mong Dagang.
Kaban Kunsil Nengeri (ADUN) Bukit Begunan nya madah, penyulut nembiak ba dalam bidang pelajar mesti seruran dikemeratka.
Nengah sebengkah penerang ba laman Facebook, iya mega meransang nembiak ke kurang nyulut ba dalam bidang pelajar, anang mudah mantul sereta terus bekenanas ngemansangka diri ba pengawa sekula.
Iya mansutka pekara nya rambau bejadika Program Anugerah Nembiak Nyulut (APC ) SK Kem Pakit, Sri Aman Ke-47 ti diatur ba Diwan Perkasa, kemari.
Ba program nya, Mong meri terima kasih ngagai bala pengajar ti udah bebendar meri penemu ngagia nembiak sekula ti ngujungka sida bulih anugerah beserimbai enggau APC nya.
Kelimpah ari meri setipikit enggau perais, mensia mayuh ke bisi datai ngulu program nya bisi diperindang enggau program tanda sereta belagu ke ngaul nembiak SK Kem Pakit.
Ngelansa pekara bukai, sebedau tu, Mong bisi nurun ngabas sereta betemu enggau perayat ba Sungai Sunga, Lingga seraya meda pemansang enggau ningaka sebana ke bisi dibantaika komuniti ke mendam dia.
Iya mega meri terima kasih ngagai perintah Sarawak ti mekuhka pemansang sektor betanam betupi di sitak DUN Begunan, ke nyadi entara sektor ti tau nyungkak tikas sosio ekonomi rayat.-TVS
