KUCHING, 10 Jan: Opis Luyar Menua (AGC) benung mansik penumbuh Unit Bechara enggau Apil lebih agi endur mendingka apil jenayah di Sabah enggau Sarawak.
Luyar Menua, Datuk Mohd Dusuki Mokhtar nyemetak madahka unit baru nya deka bisi pendawa raya ke tebalan sereta bepengelandik tinggi.
Kenu ku iya, penumbuh unit nya dipelaba deka nambahka penyikar sistem apil jenayah ba kededua wilayah sereta berundingka bemacham pekara berat.
“Pendawa raya mega diperansan ngaul diri dalam pengawa bejar seumur idup nengah bengkel enggau nyerungkai teknologi baru dikena nambahka agi tikas profesionalisme enggau penyikar sida,” ku iya.
Ba pengawa negapka proses kereja, AGC mega merambu deka bejalaika sistem e-Rejister penuh ba Sabah enggau Sarawak berengkah taun siti nyin ila.
“Pejalai penuh sistem e-Rejister ke Sabah enggau Sarawak betuju nentuka pemujur pengawa rejister keretas pansik ke dimalin semua ejensi penerit adat ungkup AGC,” ku iya.
Iya mansutka pekara nya maya Pengawa Bejadika Taun Undang-Undang Sabah enggau Sarawak 2025 diatur ba Hikmah Exchange Event Centre (HEEC) sehari tu tadi.
Sama bisi datai Tuai Akim Menua, Tun Tengku Maimun Tuan Mat; Presiden Kort Apil, Tan Sri Datuk Amar Abang Iskandar Abang Hashim; Akim Besai Malaya, Datuk Seri Hasnah,Dato Mohammed Hashim; Akim Besai Sabah enggau Sarawak, Tan Sri Abdul Rahman Sebli; Luyar Besai Sarawak, Dato Sri Saferi Ali; enggau Luyar Besai Sabah, Datuk Brenndon Keith Soh.
Ku terang Dusuki, atur nya ukai semina ngelengkaska pengawa, tang mega nambahka pengelurus dalam ngatur kes.
Bekau ari nya,AGC mega udah mindah sereta pengawa ngemanah tujuh Opis Pendawa Raya Pelilih di Sabah enggau Sarawak, tuju tu dikena nyendiaka perampa palab gawa ke lebih kondusif sereta lantang ungkup pegawai pendawa kededua wilayah nya.
Ketetiga perambu nya endang pelin strategik dalam negapka sistem undang-undang di Sabah enggau Sarawak sereta numpu ngagai inovasyen, pengawa ngemanahka infrastruktur enggau pemansang modal mensia ba taun tu. – TVS
