DARO, 9 Jan: Jematan Muara Lassa udah dibuka ngagai mensia mayuh berengkah sehari tu, lalu ngujungka servis feri ba Batang Lassa diketuka.
Sapit Menteri Infrastruktur enggau Pemansang Penyangkai Kapal (Pemansang Infrastruktur) Datuk Aidel Lariwoo taja pia madahka, servis feri nya engka dipindahka ngagai kandang endur ke bukai dikena nangkup peminta trafik.
Ku iya madah, iya mega minta Opis Kereja Raya (JKR) berundingka senentang penambah servis feri ba Batang Paloh enggau Batang Igan.
“Trafik dipelaba nambah ba kandang endur tu sepengudah Jematan Muara Lassa berengkah ditengah sereta diguna. Penambah servis feri ba kedua-dua kandang endur dikearapka ulih mutarka penyekut trafik nyentukka jematan bukai di kandang endur tu tembu, ti dipelaba ujung taun tu tauka pun taun baru,” ku iya.
Iya munyi nya ngagai media ba pengerami Pra Bejadika Jematan Muara Lassa ditu sehari tu tadi seraya nerang senentang operasyen feri sepengudah penembu jematan nya.
Sama bisi datai Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Kaban Parlimen Igan Ahmad Johnie Zawawi, Kaban Parlimen Tanjong Manis Yusuf Abdul Wahab sereta Kaban Kunsil Nengeri Daro Safiee Ahmad.
Jematan Muara Lassa ti digaga enggau ungkus RM600 juta sereta ngembuan pemanjai 2.43 kilometer nya sebagi ari projek infrastruktur ke chukup beguna dikena nyambung Pulau Bruit enggau Daro di bagi menua Mukah.
Pengawa rasmi bejadika jematan tu deka dikemujurka Premier Sarawak Datuk Patinggi Tan Sri Abang Johari Tun Openg kena 22 Februari tu ila. – TVS
