SPAOH, 2 Jan: Kaban Kunsil Nengeri (ADUN) Bukit Saban Datuk Amar Douglas Uggah Embas madahka aum ngaul kaban Komiti Projek Transformasyen Menua Pesisir (RTP) ba sitak nya deka diatur pun taun tu.
Ku iya, tuju aum nya diatur dikena ngulihka penerang tauka status pemansang pemadu baru projek RTP ungkup taun 2024 ba (DUN) Bukit Saban.
“Siti ari pengawa aku enggau Kaban Parlimen (Betong) diatu iya nya deka nemu naka ni pemansang projek RTP, MRP enggau projek bukai ti udah dipejalaika taun 2024.
“Ungkup sitak Bukit Saban taga kitai ungkup projek nya tembu taun 2024, mesti tembu taun 2024 lalu udah tu ila kita nemu status semua projek nya,” ku iya.
Iya madahka pekara nya sepengudah nemuai seraya ngabas tiga taba projek ke udah tembu ba DUN Bukit Saban ditu, empai lama.
Udah nya, lebuh ngelansa pasal pengawa ngemanahka waterfront Spaoh, Uggah madahka, pengawa ngaga tiga pintu ai ba tebing nya beguna amat dikena nyeliahka pasar mit Spaoh ari kena penusah ampuh bah.
Pia mega tuju ngemanahka infrastruktur ba waterfront nya laban endur nya antara palan ke suah ditapatka bala temuai enggau komuniti lokal di Spaoh.
Pengawa ngemanahka waterfront Spaoh dibagi ngagai dua projek, keterubah pengawa ngintu pemeruan Sungai Spaoh ti diengkah ba baruh Opis Parit Enggau Entali Ai (DID) bagi menua Betong ke ngena kos sepenyampau RM300,000.
Udah nya, kedua, kereja ngaga pintu ai enggau ngangkatmanah waterfront Spaoh ngaul endur ba sepanjai waterfront nya ba baruh Ejensi Pemansang Bagi Menua Betong (BDDA) ti ngena projek sepenyampau RM500,000.-TVS
