DEBAK, 2 Jan: Pengawa ngangkatmanah perengkaguna pemun baka bekal elekterik enggau bekal ai beresi deka terus nyadi agenda besai perintah Sarawak ba sitak Kunsil Nengeri (DUN) Saribas.
Sapit Menteri Pemansang Orang Indu, Nembiak Mit Enggau Pengelantang Komuniti Sarawak Datuk Mohammad Razi Sitam madah iya ngarapka perayat di Saribas terus bulih pemaik enggau ngasaika pemansang ari perintah Sarawak ke mujur nyadika wilayah tu bepenatai pemisi tinggi kenyau dua taun ke udah.
“Aku mekuhka ngagai pemansang pemun iya nya infrastruktur.
“Nya alai, kami mekuhka ngagai pengawa ngangkatmanah ari sukut bekal elekterik bekal ai beresi taja pan semua udah bisi ba sitak Saribas.
“Kami deka tu dikemanahka tebal agi perengkaguna elekterik berindik ari penambah perayat enggau penambah umah baru di Saribas,”ku iya.
ADUN Saribas nya mega madahka proses peminta ungkup perayat dikena ngulihka bekal elekterik disambung ngagai rumah sida mega deka dirumban sereta lebih muntang agi udah tu ila.
Ku iya madah agi, tu beguna bendar sebagi ari daya raban iya dalam ngemansangka sitak Saribas seriris enggau pemansang menua pesisir bukai di Sarawak.-TVS
