KUCHING, 2 Jan: Taun 2025 nyadi peluang ngagai semua rayat Sarawak ngambika nyingkang enggau semangat baru ungkup pemansang tanah Kenyalang.
Nengah pesan taun baru 2025, Premier Sarawak Datuk Patinggi Tan Sri Abang Johari Tun Openg madah diri berasai gaga ati enggau penyulut ke dijapai sepanjai 2024 asil kerejasama enggau penyerakup semua rayat pupu bansa.
“Ba 2025 tu, aram kitai sampal ngemansangka Sarawak ngagai nengeri ke likun, lantang enggau inklusif.
“Enggau mayuh bengkah inisiatif pemansang ke benung dipejalaika tu, aku pechaya nengeri Sarawak ulih mansang nengeri pelasar ke meruan,”ku iya.
Abang Johari madahka, 2025 nyadi taun kepenudi Langgur Pemansang Malaysia Lumpar Ke-12 (RMK12) dipejalaika.
Ba baruh RMK12, Sarawak udah bejalaika mayuh bengkah projek infrastruktur baka jalai, jematan, bekal elekterik, bekal ai sereta projek sosioekonomi baka pemansang industri mit enggau jelan pemesai (SME).
“Aku ngarapka daya dalam bejalaika RMK12 di Sarawak ditambahka ba taun 2025 ngambika semua projek ke udah dirintai ulih dipejalaika enggau mujur sereta meri pemaik ngagai rayat tebal agi projek fizikal.”
“Ba taun 2025 mega, pansik setengah penggal deka dipejalaika ngagai Strategi Pemansang Pasca COVID 19 2030 (PCDS) 2030 dikena beratika pemujur pejalai program enggau projek ba baruh PCDS 2030,”ku iya.
Nangkan ke nya, Abang Johari madahka 2025 deka mandangka penyungkak sektor betanam betupi moden enggau nguna teknologi pintar seraya diatu benung nengkira diri bejalaika pelajar pechuma ba renggat pelajar tinggi ba taun 2026.
Ku iya madah agi, inisiatif tu meri empas besai ngagai raban nembiak di Sarawak.-TVS
