SARATOK,2 Jan: Empat bengkah menua di Krian ngaul rumah panjai Brayang, Mudong, Kop Ibus enggau Ulu Sebetan deka nerima bekal ai beresi enda lama agi.
Kaban Kunsil Nengeri (ADUN) Krian, Friday Belik madahka, projek nya beungkus RM33 juta benung ba proses survei enggau nyendiaka dokumen tinder.
“Kami udah bulih pemendar ari Opis Menteri ari Perintah Nengeri Sarawak dikena mekalka ai beresi ari JBALB ungkup kandang menua di Ulu Sebetan sereta mega di Brayang, Mudong enggau Kop Ibus ti udah bisi agih belanja ari Perintah Nengeri.
“Ungkup kandang menua di Ulu Grenjang ke mega udah dikemendarka ba baruh Opis Menteri Pemansang Tumpuk Pendiau enggau Wilayah Malaysia (KKDW).
“Semina diatu kami nganti proses survei sereta pengawa nyendiaka dokumen tender ari raban ke bekaul,” ku iya.
Friday madah munyi nya rambau dirandau TVS penguhda tembu pengawa nyerahka tangki ai ngagai perayat di Roban, empai lama.
Nangkan ke nya nya, Friday nerangka, nyauka semua kandang menua enggau genturung pendiau di Krian diatu udah bisi bekal ai beresi disediaka Opis Bekal Ai Menua Pesisir (JBALB).
“Penanggul suntuk ai ba kandang endur ke maya nya bisi penanggul ai ari JBALB ketegal bekal ai kami ke enda chukup maya nya.
“Tang enti kitai beratika taun ke udah, kami kurang nerima sebana ari sukut nadai bekal ai.
“Taja pia, ke alai tangki tu udah dikemendarka, kami mega deka nganjung nya nyadika perengka nyimpan ai ngagai peranak menua nya.
“Nyangka bisi penanggul bekal ai ketegal paip pechah enggau ke bukai, awakka kitai bisi endur nyimpan ai dikena ninting hari,” ku iya.
Bisi 1,463 tangki ai deka diberi ngagai pengani ba 83 buah rumah panjai di DUN Krian sechara berenggat berengkah ari 28 Disember nyentuk ke 19 Januari tu.
Nitihka rikod, projek ngangkatmanah loji ai beresi di Kaki Wong ke ngena kos sepenyampau RM110 juta udah dikemendarka perintah Sarawak.-TVS
