DEBAK, 2 Jan: Ejensi pengatur ke udah dichiri diansak patut lengkas bejalaika Projek Pemansang Agropark ke udah dikemendarka di Debak.
Sapit Menteri Pemansang Orang Indu, Nembiak Mit Enggau Pengelantang Komuniti Sarawak Datuk Mohammad Razi Sitam madahka projek nya beguna bendar dikena ngemansangka tanah ungkup tuju betanam tupi.
“Inisiatif kami ngemansangka ekonomi rayat tebal agi di Saribas tu iya nya kami udah ngemendarka siti projek pemansang Agropark.
“Nya alai, aku ngarapka ejensi pengatur ke udah dichiri tu ulih lengkas agi bejalaika projek tu laban tu udah dikemendarka Perintah Sarawak.
“Projek tu chukup beguna dikena meri peluang ngagai perayat Saribas ngemansangka tanah tauka bidang betanam betupi ba sitak nya,”ku iya.
Iya ke mega Kaban Kunsil Nengeri Saribas mansutka pekara nya rambau aum media ba sebengkah program ke diatur ba Debak empai lama.
Ku iya madah, projek nya nemban bendar dipejalai ba sitak nya berindik ari Saribas udah dipasukkan dalam rintai siti ari endur pemansut pemakai di Sarawak.
Ungkup perambu timpuh panjai Saribas deka mekuhka ngagai pemansang ke nyendiaka premis-premis ungkup aktiviti ekonomi perayat tebal agi ba Pasar Debak.
Ku iya madah, bisi projek sebedau tu udah dikemendarka tang agi dalam rintai dipejalaika.-TVS
