SPAOH, 2 Jan: Palan servis khas endur bejalaika Projek Transformasyen Menua Pesisir (RTP) DUN Bukit Saban udah ditumbuhka.
Sapit Premier Sarawak, Datuk Amar Douglas Uggah Embas madahka, palan nya beguna amat dikena nentuka tetiap projek RTP di Bukit Saban ulih tembu nitihka timpuh ke udah ditetapka.
”Taun baru kitai mega ngarapka sereta naga tetiap projek di Bukit Saban ke diperambu ungkup taun 2025 deka tembu ba taun ke sama.
“Kami udah ngaga program ngambika palan servis tu deka mantu ejensi bejalaika pengawa, ngambika proses bejalaika pengawa ulih dipejalaika manah sereta kami ngarapka ujung taun, projek nya mesti tembu.
“Nya alai kami deka neruska polisi nengeri ngambika projek RTP ti udah dikemendarka tembu ba taun ke sama,” ku iya.
Uggah nerangka, palan servis khas nya dikena mantu raban ejensi bejalaika projek ti dichiri ungkup tetiap projek dalam pengawa nyendiaka ‘Billl Off Quantities’ (BQ).
Tandu iya, nengah pemisi palan servis khas nya, tetiap kos ungkup sesebengkah projek RTP ti dipejalaika di Bukit Saban deka ditemu sebedau ujung bulan tiga sereta projek nya disadang deka dipejalaika enggau lanchar agi ari ke udah.-TVS
