SIBU, 2 Jan: Perintah komited deka meda industri dagang temuai bepelasarka budaya pekara ti dikemeratka dalam pengawa negapka ekonomi menua sereta nyungkak penatai pemisi rayat.
Menteri Dagang Temuai, Seni Enggau Budaya (MOTAC), Dato Sri Tiong King Sing madahka, sektor dagang temuai budaya mandangka potensyel ti signifikan enggau penambah ke besai dalam penyampau temuai enggau belanja dagang temuai sepanjai taun 2024.
“Nitihka penerang ari Opis Statistik Malaysia, pengawa dagang temuai domestik di Malaysia ungkup semilan bulan keterubah taun 2024 ngerikodka penatai 193.3 juta temuai enti dibanding taun 2023 iya nya 158.7 juta temuai.
“Tu udah mandangka penambah 21.8 peratus. Seraya belanja dagang temuai domestik ari bulan Januari ngagai September 2024 manggai RM77.8 bilion enti dibandingka enggau taun 2023 iya nya RM61.2 bilion ti mandangka penumbuh 27.2 peratus.
Iya mansutka jaku nya rambau Program MOTAC Begulai Komuniti Sibu berserimbai Pengerami Mantar Taun Baru 2025 diatur ba Palan Lumba Komuniti Azman Hashim di Sibu Jaya, empai lama.
Iya mega madahka, penatai temuai menua luar ngayanka penambah ti besai iya nya 32.2 juta temuai ari bulan satu nyentuk ke bulan November 2024, dibanding enggau 25.9 juta temuai dalam timpuh ke sama ba taun 2023 iya nya penambah sepenyampau 31.8 peratus.
Tiong nyemetak madahka, opis menteri iya deka terus chakah ngelakuka dagang temuai ti bepalasarka budaya ba taun 2025 nengah bemacham program enggau aktiviti.
Entara iya, iya nya program bejual malam hari ti deka diatur nengah kerejesama palan bebelika barang di selampur nengeri enggau promosyen pemakai dalam pakej khas mega deka dipejalaika dikena ngelakuka pemakai lokal di malaysia.-TVS
