DEBAK, 2 Jan: Kaban Kunsil Nengeri (ADUN) Saribas Datuk Mohd Razi Sitam ningkah jaku petenah ke ngumbai pengari rayat bisi bulih untung peratus ari projek besai di DUN Saribas.
Ku Razi, jaku petenah nya kebendar enda betul sereta mandangka nya semina ungkup ke guna politik raban ke bekaul.
“Enda betul lalu aku nemu bisi sekeda raban ke enda puas ati enggau nguji ngachau kami ngemansangka Saribas.
“Nya alai ulih dipadahka aku Saribas diatu udah nyapai penuh perengkaguna pemun ke dirandaka rayat,
“Taun baru (2025) kami deka ngemanahka agi pemansang-pemansang ke bisi diatu ngambika seriris enggau endur menua bukai di menua pesisir.
“Kami ngarapka menua pesisir di Saribas ulih terus ngasaika pemaik enggau pengelantang,”ku iya.
Razi mansutka jaku timbal nya lebuh nerangka pasal sebengkah berita pelesu ke dikerembai ngagai rayat di Saribas.
Ku iya madah, pekara nya endang suah nyadi dalam dunya politik lalu iya ngelalau perayat di Saribas anang mudah pechaya ke petenah ti nadai ngembuan penerang ke nyata baka nya.
Ku terang iya, semua projek ke dipejalaika ngena chara tender tebuka sereta penuh integriti.-TVS
