SARATOK, 29 Dis: Siku orang lunggar umur, Renang Saying, 57 taun ditu udah mujur dibantu teulih sebuah rumah baru nengah sebengkah ari inisiatif manah ke bisi dikembuan perintah nengeri.
Kaban Kunsil Nengeri (ADUN) Krian Friday Belik madahka, rumah tudah renang mujur digaga nengah Projek Ngemanahka Rumah Seranta Sarawak (PPRMS) ti ngena kos sepenyampau RM60,000.
“Ninting taun kitai (Perintah Sarawak) bisi nyendiaka agih sepenyampau RM1 juta ungkup semua DUN dibaruh GPS.
“Ungkup rikod, kitai Krian udah berengkah bulih agih RM1 juta dikena ngemujurka program (PPRMS) tu kenyau ari 2022 nyentuk ke diatu.
“Nya alai, penyampau sida ke udah dibantu nengah inisiatif tu lebih ari 20 buah rumah panjai nyengkaum sida ke diau nyembuah sekalinya ungkup ngemanah aja lalu baka enggi Renang digaga rumah baru.
“Tu mih sebagi ari chara dikena Perintah Sarawak mantu raban ke kurang pemisi ngambika tau buloih rumah baru,” ku iya.
Friday mansutka jaku nya rambau bejadika rumah baru dipenggi siku orang lunggar umur, Renang Saying di Meruji, Kabo empai lama.
Friday mega nerangka, raban sida seruran komited nentuka nasit genap iku rayat ti begunaka bantu kelebih agi di Krian seruran dijaga sereta dikenatika.
Taun siti nyin tadi, cherita pengidup sereta penanggul ke ditapi tudah Renang Saying ti diau ba sebuah langkau repuk di Meruji Kabo Saratok udah nerima perati ari ADUN Krian, Friday Belik.
Bekau ari nya, iya terus mega minta ejensi ke bekaul bejalaika pansik silik senentang pekara nya seraya ngujungka sebuah rumah baru nya tembu digaga bulan Oktober tu tadi.-TVS
