SARATOK, 29 Dis: Kaban Kunsil Nengeri (ADUN) Krian Friday Belik andal semua projek ke meri empas tinggi ke udah diperambu di Krian ba baruh Ejensi Pemansang Bagi Menua Betong (BDDA) ulih berengkah dipejalaika taun baru.
Ku iya, pengawa bejalaika semua projek nya beguna amat dikena ngangkatka tikas sosio ekonomi rayat di DUN Krian.
“Enti kitai madah ulih tembu, pelaba aku nya enda ulih tang enti ulih dipunka, nya utai ti dikedeka kitai.
“Nangka kitai enda sempat nembuka iya dalam timpuh setaun, tang kitai ngarapka sekeda projek nya ulih berengkah digaga sereta ba taun 2025,” ku iya.
Iya mega nyemetak madahka, entara projek ke dijangka deka dipejalaika taun baru, nyengkaum Projek Ngangkatmanah Jalai Ulu Awik enggau Ngemanahka Tikas Kompleks Lumba Enggau Main Saratok.
Taun siti nyin kemari, bisi 16 projek ke meri empas tinggi ti beungkus RM200 juta udah diperambu deka dipejalaika di sitak DUN Krian.-TVS
