KUCHING, 26 Dis: Servis Perintah Nengeri Sarawak (PANS) mesti ditegap awakka terus bisi daya semekih, efektif, sikar sereta inovatif maya meri servis ngagai rayat di wilayah tu.
Sekretari Perintah Sarawak, Datuk Amar Mohamad Abu Bakar Marzuki madahka, pemujur servis perintah taun tu mesti nyadi lalau enggau teladan dikena nambah enggau ngemanahka agi servis sida dalam taun baru ti deka datai.
Iya nengah Pesan Krismas ti dikunsi ba dalam laman Facebook, Unit Komunikasyen Perintah Sarawak (UKAS) madahka, taun 2024 udah meri peneleba ke bisi manis enggau pait ngagai raban pengereja perintah Sarawak dalam napi bemacham pemar enggau penguji.
“Raban pengereja perintah Sarawak napi bemacham pemar enggau penguji dalam taun 2024 mantu ngemansangka perintah Sarawak serta mujur nyapai asil ke manah,”ku iya.
Iya nerangka, nengah kerejasama enggau pengeransing semua, servis perintah Sarawak terus ngerembai, sikar sereta nyadi kedap pemansang nengeri ungkup pengelantang enggau pemaik rayat.
Beduduk enggau nya, iya meri tumpu senentang pemayuh leman pupu bansa enggau pengarap di sarawak nyadi pelasar penyerakup enggau pemaik nengeri tu.
Pemujur nya senutuk enggau semangat penyerakup ti mungkur rayat ari mayuh macham penatai sereta ulih dipeda beserimbai enggau pengerami Krismas serak tu ti diintu semua bansa ke ngemeratka ulah bebasaa pangan diri.
Tandu iya, taun 2025 deka mai mayuh agi pemansang, pengelantang enggau pemaik ngagai Sarawak ti ulih diasaika rayat di selampur nengeri tu.-TVS
