SIBU, 26 Dis: Penyerakup ti ditanggam lama pedis dikeruga lebuh komuniti meretika senentang bida pengarap enggau ngembuan basa ke tinggi ngagai pengarap bukai.
Kaban Kunsil Nengeri (ADUN) Nangka, Datuk Dr Annuar Rapaee madahka, penyerakup komuniti di sarawak ditanggam kenyau ari sekula primari ke alai mayuh sekula ngembuan nembiak ti datai ari pupu bansa.
Kelimpah ari nya, pengawa tikah champur ti majak nambah di Sarawak mega mantu ngangkatka pemereti tikas ulah bebatak asur entara rayat di Sarawak.
Di Sibu kua iya, elemen-eleman tu endang dikemeran ba Kampung Nangka ke alai bisi sekeda peranak ti bepengarap Kristian diau begulai enggau diri sebala sida ti bepengarap Islam.
“Ketegal nya, kitai mereti peminta enggau mega adat.
“Pengarap bansa bukai mega beguna amat, nya kebuah kitai ngeletakka ulah bebasa kitai ngagai pengarap bukai endang tinggi, ukai semina bebatak asur tang ari basa kitai,” ku iya.
Iya ke mega Sapit Menteri Pelajar, Inovasyen Enggau Pemansang Bakat Sarawak nya madah, beguna amat ngetan enggau nyaga pemanah kaul tu lebih agi bisi sekeda endur bisi nyadi isu penyarut ti ngaul jalai pengarap.
Iya mansutka jaku nya pengudah ngabang Krismas ke rumah Tuai Genturung Pendiau Catherine Ali di Kampung Nangka, ditu kemari.
Ku iya nerang, pengawa ngabang nya sebagi ari adat ti seruran dikemeran komuniti di Sibu.
Beduduk enggau nya, iya ngarap pengerami Krismas ulih nyerakupka agi komuniti di Sarawak.-TVS
