SARATOK, 26 Dis: Semangat enggau ulah beserakup antara rayat pupu bansa ngujungka mayuh pemansang ulih dipejalaika perintah Sarawak sechara holistik tauka mungkur semua aspek.
Kaban Kunsil Nengeri (ADUN) Krian, Friday Belik madahka, pekara nya endang beguna amat sereta mesti ditan dalam nentuka pemansang ba sesebengkah endur, tebal agi menua pesisir terus dikenatika sebaka enggau pemansang di nengeri bukai.
“Ari kitai ke ulih begempung sepenemu begulai enggau pangan diri dia atur mai pemansang ari Perintah GPS ulih dipejalai kitai enggau manah enggau meruan sereta enggau mujur agi.
“Nya endang juluk ati kitai laban kitai enggai nyadika penyerekang penemu tauka penyerekang politik nyadika penanggul dikena kitai mai projek pemansang ngagai rayat lebih agi di Krian ditu.
“Nya alai kitai begunaka sukung kerejasama sepenemu enggau pangan diri awak ke senang ngatur projek ke besai-besai ke tau nguntungka rayat ditu,” ku iya.
Friday mansutka jaku nya rambau Program Ngabang Hari Krismas Ngagai Rumah Alexander di Sungai Galah Krian, kemari.
Iya mega nerangka pasal aktiviti ngabang ti suah diatur pengani rumah panjai di Krian nyerumba pengerami Krismas nyadi pelasar nyerakupka komuniti enda milih renggat umur enggau bansa.
Ku iya madah, adat ngabang sigi nyadi tradisyen di Sarawak sereta mesti ditan enggau diintu nyentuk ke jemah.
“Tu endang udah adat kitai ukai semina deka berami tang kitai deka betemu enggau pangan sereta kaban lalu ngenataika Selamat Hari Krismas.
“Kitai berandau enggau pangan diri dikena kitai ngerapatka agi kaul kitai enggau pangan diri,” ku iya.-TVS
