KUCHING, 24 Dis: Premier Sarawak, Datuk Patinggi Tan Sri Abang Johari Tun Openg setuju ngungkupka belanja sepenyampau RM110 juta ngagai Unit Pekara Pengarap Bukai (UNIFOR) ungkup taun 2025.
Pemutus tu dipadahka Sapit Premier Sarawak, Datuk Amar Douglas Uggah Embas seraya ngayanka sukung perintah ngagai rumah sembiang enggau sekula misyen di wilayah tu.
“Tu siti pemeri Krismas ti dikelaluka raban bepengarap Kristian lalu udah tentu pemeri taun baru ti dianti semua kitai.
“Tu mega siti agi manifestasyen polisi inklusiviti rama ari Perintah Gabungan Parti Sarawak (GPS), siti pengelebih ti nyelai ke tau dikemegahka kitai.
“Nya pengawa ti chukup manah ari siku ketuai, ke patut diterima manah,”ku iya.
Iya madah munyi nya nengah Pesan Krismas iya beserimbai enggau Pengerami Ngintu Hari Krismas 2024 enggau Taun Baru 2025, sehari tu tadi.
Ungkup rikod, ungkup taun 2024, UNIFOR udah nerima bantu agih belanja ke sebaka ti ngemuntangka UNIFOR ulih mantu 242 buah rumah sembiang nengah belanja penyampau RM90 juta, ditangkan RM20 juta agi diberi ngagai sekula misyen.
Ba awak ke sama, Uggah mega nesau semua rayat Sarawak ngambika sama bela ngerami semangat Hari Krismas kelimpah ari ngenegapka pengelantang enggau kaul penyerakup entara pupu bansa di nengeri tu nengah adat ngabang nyerumba pengerami ngelaluka pengabang bala bakih ke sama megai pengarap Kristian.
Iya mega minta rayat nengeri tu ngambika seruran bepegai teguh ngagai konsep ‘Segulai Sejalai’ ngambika ulih nyapai juluk Sarawak ti deka nyadi sebuah nengeri bepenatai pemisi tinggi manggai taun 2030 ba baruh Strategi Pemansang Pasca Covid-19 (PCDS 2030).-TVS
