KUCHING, 24 Dis: Tuai Pemegai Menua Nengeri (TYT) Nengeri Sarawak, Tun Pehin Sri Dr Wan Junaidi Tuanku Jaafar ngemeratka pemesai guna penyerakup nyadi pelasar pemaik enggau pengelantang di Sarawak.
Nengah Pesan Khas nyerumba Hari Krismas 2024 sehari tu, iya nesau semua rayat Sarawak terus ngetanka kaul rat entara bansa enggau jalai pengarap ke nyadi penegap nengeri tu.
“Aku meri terima kasih ngagai semua rayat Sarawak ti mengkang beserakup sereta beserakup ngetanka pengelantang ti udah digaga kitai ngelama tu,” ku iya.
Tun Wan Junaidi nyemetak madahka ulah bebasaka ti bebida ukai semina meri peneleba pengidup tang mega negutka kaul entara pupu bansa.
“Aku pechaya semua kitai udah nyadi siti ruang bilik ti seruran ngintu pemerat, pengelantang enggau utai ti diguna ruang bilik bukai,” ku iya.
Tun Wan Junaidi mega nerang, konsep inklusif dalam penyelai bansa nyadi penegap komuniti Sarawak ti mekuhka pengawa baka siti ruang bilik.
Berebak enggau nya, Tun Wan Junaidi nangkan rayat Sarawak bekaul enggau pemesai guna besaup enggau pangan diri dalam napi pemar kelebih agi ba gaya pengerami enggau musin landas ti benung nuntung jam ke diatu.
Iya mega meri terima kasih ngagai raban pengelikun ti seruran sedia nyaga pengelikun rayat kelebih agi maya musin landas.-TVS
