BETONG, 24 Dis: Pengerami Krismas taun tu diintu enggau jelan aja, pia ku penanyi veteran tebilang Iban, Margret Micheal Jalang.
Ku iya, Krismas serak tu diintu enda besai berindik sida sebilik ti agi bebasaka bala sepiak laki iya ti udah lenyau orang ti dikesayau bedau lama ke udah di Sebuyau.
Ku terang iya, pengawa bebasa tu nyengkaum enda ngatur sebarang program pemerindang nyerumba pengerami Krismas taun tu.
“Pengerami Krismas serak tu kurang richah laban entua aku ke lelaki baru udah nadai, ensanus udah dikuburka.
“Pia mega, entua menyadi aku ke lelaki pan baru udah nadai ensanus. Nyadi pengerami diintu jelan iya aja.
“Enti ngelama tu endang chukup richah nitihka adat orang Iban laban bebasaka adat kitai, enti bedau ngetas ulit kitai enda ulih kelalu richah.
“Krismas tetap diintu tang reti ku aku kami sebilik semina begagaka kuih enggau besumaika pemakai ungkup diri sebilik,” ku iya.
Nangkan ke nya, ku iya sida sebilik tetap ngelaluka penatai baka kaban belayan ti deka ngabang ngaga rumah sida.
Nya alai, enggau peluang tu iya meri Selamat Hari Krismas nuju semua ti ngintu pengerami nya lebih agi bala peminat ke seruran nyukung karier iya ari taun 1991 kelia nyentuk ke diatu.
“Nuju kitai Iban ke ngintu Krismas, aku meri Selamat Hari Krismas ngagai semua peminat aku ba selampur Sarawak sereta Semenanjung. Selamat Hari Krismas enggau Taun Baru,” ku iya maya dirandau TVS ba rumah panjai iya empu di Muton Baru, Pusa sehari tu tadi.
Ke penerang, Margret siku ari penanyi veteran Iban ke kala tebilang enggau lagu-lagu ke diberi nama Anang Nuan Nyindir, Nama Nuan Milih Aku, Chelap Angat, Bujang Lelingai sereta mayuh agi ke bukai.-TVS
