KUCHING, 24 Dis: Premier Sarawak Datuk Patinggi Tan Sri Abang Johari Tun Openg, nesau rayat di nengeri tu terus ngemeranka prinsip rasional sereta nyeliahka pekara ti tau ngeruga penyerakup.
Ku iya madah, ulah bebasaka pangan diri beguna amat dalam komuniti Sarawak ti datai ari bemacham pupu bansa enggau jalai pengarap seraya ulih nempa nengeri tu nyadi chunto pemadu manah ulah penyerakup di menua tu.
“Tu mih ulah komuniti kitai di Sarawak ti udah dikembuan sereta diterenak kitai ngelama tu lalu nyadika pesaka ti diturunka ngagai kitai ari rebak ke dulu ari kitai.
“Enda ngira pengarap kitai tauka penemu kitai senentang sekeda isu, anang kitai enda ngira ulah bebasaka pangan diri anak Sarawak dalam interaksyen kitai sepanjai maya.
“Baka jaku sempama, mayuh macham ulah enggau bida, taja pia, kitai seruran rasional dalam ulah kitai lalu nyeliahka diri ari ngadu pengawa ti tau ngeruga penyerakup tegap ti udah digaga kitai sebedau tu,” ku iya.
Iya madah munyi nya nengah Pesan Krismas nyerumba pengerami Hari Krismas 2024 sehari tu tadi.
Ngelansa pasal adat ngabang maya musin pengerami, iya nerangka nya mandangka budaya ti udah lama bisi di Sarawak ti mandangka saum sepenemu enggau pengelantang dalam komuniti pupu bansa.
Udah nya, Abang Johari mega nerangka pengeransing Sarawak mulaika sereta ngetanka hak nengeri tu ukai semina deka ngulihka penguntung ungkup diri tauka meri penyarut.
Tang kebendar ku iya, tetiap pemutus berani ti digaga perintah Sarawak iya nya bepelasarka undang-undang ti sah.
“Nyadi anak Sarawak, kami amat beterima kasih laban ulih beserakup sereta bekerejasama ngemansangka Sarawak sereta ngetanka hak Bumi Kenyalang.
“Pengeransing kitai mulaika sereta ngetanka hak Sarawak ukai ketegal kitai amu tauka deka ngaga penyarut, genap pengawa ke digaga kitai bepelasarka undang-undang,” ku iya.
Entara pekara bukai, iya madahka pengeransing tu ungkup pengidup jemah Sarawak ti lebih meruan lalu ukai ungkup guna sekeda raban aja.
Iya mega nerangka aspek penyerakup rayat nyadi elemen ti beguna dalam pengawa mulaika sereta ngetanka hak Sarawak, kelebih agi dalam langkar undang-undang nengeri tu.-TVS
