KUCHING, 23 Dis: Gerempung Anak Seni Iban Malaysia (PASIMA) merambu deka ngatur Pekit Bintang Lagu Klasik Iban richah agi taun baru.
Presiden PASIMA, Isa Lee madahka, tu ari siti langkah rapat dikena ngangkat sereta ngeranchakka industri lagu Iban ngagai tikas ke lebih tinggi.
“PASIMA keterubah iya ngatur Pekit Bintang Klasik dalam taun 2012 ke alai kami udah ngadaka beberapa iku penanyi Iban ti tebilang baka Eisner Nala, Tony Rumpang, Jessica Remaya enggau ke bukai.
“Kepenudi, kami ngatur Pekit Bintang Klasik dalam bulan November 2023 lalu ari nya udah mujur ngansah bakat ti dipasuk 10 finalis.
“Naka ke diatu, sekeda ari sida diatu udah mujur ngerikod lagu lalu udah mujur nyadi artis Iban,” ku iya.
Iya madah munyi nya ngagai TVS seninjik ngulu Pengerami Makai Lemai Pra Krismas PASIMA diatur ditu, empai lama.
Program nya digulu bala kaban PASIMA betuju dikena ngedut agi penyerakup bala kaban gerempung kelimpah bekunsika buah penemu ke pemaik industri lagu Iban di menua tu.
Isa Lee mega nerangka pengawa ngatur edisyen taun ke udah, mujur matak penyereta ari menua luar baka ari Amerika Syarikat enggau Indonesia.
Pengawa tu mandangka industri lagu Iban ngembuan potensyel diangkat ngagai tikas dunya.
Asil ari Pekit Bintang Klasik Iban taun 2023 dia dua iku finalis ari menua luar diatu udah mujur ngerikod lagu Iban iya nya Ethan Hunt ari Amerika Syarikat nengah lagu ke dikumbai Ibu Bawang Mirah enggau siku agi penanyi Diah Ananda ari Indonesia ti ukai bansa Iban mujur ngerikod lagu ke diberi nama Buya Teperasa.
Seduai iya bela ngerikod lagu nya nengah kompeni rikoding ke dipenggi peranak lokal.-TVS
