KOTA SENTOSA, 23 Dis: Mayuh rebak baru nyangka jarang meda tauka enda ngelala siti agi pesaka ngepan Iban ke dikumbai Baju Kuas.
Beduduk ari nya, Akademi Serakup Dayak Iban Sarawak (ASADIA) udah ngepun inisiatif muka kelas belajar ngaga Baku Kuas disukung Kaunsil Kraf Sarawak ngambika ngepan pesaka nya terus dikelala sereta meruan bisi dipeda.
Tuai ASADIA Mabong Unggang madahka Baju Kuas tauka Baju Kapuas tu endang sebagi ari ngepan lama Iban lalu suah dikena bala Iban ke diau di pelilih Sebuyau nyentuk ke Simanggang.
“Manat amat Baju Kuas tu peda aku, suba baju tu dipun tauka dikena orang Simanggang lalu diatu iya nyau majak pegari sereta mayuh dikena orang bukai.
“Taja pia, nadai mayuh orang nemu ngaga baju tu. Beduduk ari nya, ASADIA lalu berunding deka ngatur muka kelas ngaga Baju Kuas bekerejasama enggau Kaunsil Kraf Sarawak.
“Nya alai, terima kasih ngagai Kaunsil Kraf Sarawak laban udah nyaup ngemujur kelas tu,” ku iya.
Iya mansutka penerang nya ngagai TVS sepengudah tembu ngatur kelas ngaga Baju Kuas di Opis SADIA Kuching, empai lama.
Sebedau tu bisi dua kali kelas ngaga Baju Kuas udah diatur ASADIA iya nya renggat keterubah kena 16 enggau 17 November 2024 dipasuk 15 penyereta lalu renggat kedua kena 14 enggau 15 Disember dipasuk 12 iku penyereta.
Kelas ngaga Baju Kuas nya diajar Puan Carolling carol enggau Puan Elsie Joannes.
Ku terang Mabong, pengelandik ngaga Baju Kuas ukai semina ulih ngerembaika ngepan asal Iban tang mega ulih nyungkak ekonomi enggau chara ngasilka Baju Kuas nya nyadi produk dagang kraf jari.
Berebak enggau nya, siku penyereta kelas iya nya ke dikangau nama Agnes, madah diri rindu enggau ngaga Baju Kuas laban nya siti ari pesaka ngepan Iban.
Ku iya, chukup mayuh penguntung enti nyema bisi pengelandik ngaga baju tu.
“Kelimpah dikena nambahka penemu diri, pengelandik ngaga Baju Kuas mega ulih dikena mantu nambahka penatai pemisi diri sebilik enti Baju Kuas nya digaga nyadika produk dagang kraf jari,” ku iya.-TVS
