KUCHING, 23 Dis: Presiden Gerempung Anak Seni Iban Malaysia (PASIMA) Isa Lee meransang semua penengkebang lagu sereta raban bekaul dalam ngasilka lagu Iban patut dulu betanya enggau raban tebangkar jaku Iban sebedau ngeluarka sesebengkah lagu.
Ku iya, tu beduduk ari agi mayuh lagu-lagu ke udah tembu digaga ngembuan pengilap ke sebaka iya nya ari sukut sepil sereta chara nyebut sesebengkah leka jaku ti enda berapa nemban.
Pekara nya ku iya, enda ulih diteju pia laban tau bendar meri empas ke negatif ngagai industri sereta orang bukai ti baru deka belajarka jaku Iban.
“PASIMA meri langgur penemu ngambika tetiap iku penengkebang lagu tauka raban pemekuh industri ngambi bemalinka raban tebangkar dalam Jaku Iban sebedau ngerikod tauka ngeluarka lagu sida ba dini-dini pelasar media rama ngambika pengilap nya enda nyadi baru jemah ila ungkup pemaik industri enggau Jaku Iban.
“Kitai enda meri perati ngagai sapa-sapa, tang mayuh leka lagu Iban agi salah.
“Ambika chunto ‘sida’ nya betul, tang bisi sekeda agi nyepil ‘sidak’ ti salah sereta mayuh agi ke baka nya,” ku iya rambau dirandau TVS ba sebengkah program ke diatur PASIMA ditu, empai lama.
Isa Lee nyemetak madahka, pekara tu patut dikemeratka tetiap iku penengkebang lagu Iban ngambika ulih ngasilka lagu ke manah ti bepelasarka jaku Iban ti nemban.
Tandu iya, pekara sempama tu ulih meri empas ke enda manah ngagai industri muzik enggau lagu Iban enti sema majak nyadi.
Nya alai iya ngarapka pekara baka tu enda nyadi jemah, ngambika ulih ngangkatka guna jaku Iban ti betul nengah seni pemerindang.-TVS
