SEBUYAU, 22 Dis: Program nemuai rasmi perintah Sarawak ke Jipun mujur matak pengerindu kompeni antarabansa dalam sektor ekonomi baru enggau kuasa ulih dikemaru.
Sapit Premier Sarawak, Datuk Amar Awang Tengah Ali Hasan madahka pengawa beranakka puku tu deka negapka ekonomi Sarawak sereta muka peluang gawa ti meri gaji ke besai ngagai rayat di wilayah tu.
“Sekumbang kami di Jipun, kami betemu enggau mayuh kompeni sereta mega pegawai ari METI Jipun ti berandauka bemacham pengawa dikena negapka dagang enggau pengawa beranakka puku, kelebih agi entara Jipun enggau Sarawak.
“Kitai chukup temegah ati laban nama Sarawak udah dikelala ba Jipun. Sida endang rinduka polisi kami (Sarawak), kuing tuju ke dikemeratka kami sereta chara kami ngatur pun penatai di wilayah tu,” ku iya.
Iya madah munyi nya rambau Aum Deligit Parti Pesaka Bumiputera Bersatu (PBB) Pampang Sebuyau di Dewan Pembangunan Sebuyau, kemari.
Awang Tengah nerangka, pengandal pemeranak puku ti beratika polisi perintah Sarawak sereta infrastruktur ti tegap baka Taman Industri Samalaju enggau Zon Industrian Bebas Samajaya mega meransang pengawa beranakka puku baru ari kompeni ti udah beoperasyen di wilayah tu.
Program nemuai mega meri tumpu pasal pemansang kuasa ulih dikemaru, pemansut hidrogen, ekonomi sirkular enggau Teknologi Nangkap Karbon (CCUS) setipak enggau polisi Premier Srawak, Datuk Patinggi Tan Sri Abang Johari Tun Openg ti keran deka ngemansangka ekonomi wilayah tu.
“Sarawak ba penuduk ke manah. Perintah kitai tegap, politik kitai tegap, lalu rayat idup dalam pengelantang. Semua tu ulih matak ati menua Jipun,” ku iya.
Penemuai nya mega mandangka pengerindu pemeranak puku dalam mayuh bengkah sektor nyengkaum kuasa enggau teknologi sereta muka peluang baru ungkup penumbuh ekonomi Sarawak ti meruan sereta bisi daya semekih.-TVS
