ENGKILILI, 22 Dis: Pengawa pansik deka dipejalaika baru dikena nyeriris kandang endur dipegai Penghulu ba sitak Kunsil Nengeri (DUN) Engkilili, ku Dr Johnical Rayong Ngipa.
Kaban Kunsil Nengeri (ADUN) Engkilili nya madah, atur pansik nya digaga dikena ngelancharka agi pengawa dipegai siku-siku Penghulu di Engkilili ti deka diangkat nyadi pelilih penuh.
Atur nya mega ku iya sebagi ari atur dikena nentuka genap projek pemansang ba sitak nya ulih dipejalaika enggau lebih meruan.
“Diatu kitai dalam proses ngangkatka Engkilili nyadi siti pelilih penuh di bagi menua Sri Aman.
“Enti pengawa nya udah mujur ila nyadi Engkilili deka lebih mansang ari diatu enggau mega deka bisi siku Pegawai Pelilih (DO) dikena ngemujurka agi tanggung pengawa.
“Agih belanja ari perintah pan deka mayuh agi ila nyadi tu deka ngemuntangka tanggungpengawa aku ke nyadi pengari rayat ditu dalam ngaduka pemansang menua.
“Nya alai, beguna amat ba aku kitai mengkang bekerejasama meri sukung penuh ngagai Premier sereta Perintah GPS,” ku iya.
Iya mansutka jaku nya rambau Pengerami Ngintu Taun Ke-5 Rumah Panjai Sujang Empayau di Semueh Batu 4, Engkilili kemari.
Ku iya, Tuai Rumah enggau Tuai Raban Bansa (KMKK) endang siti organisasyen ke chukup beguna nyadi tulang belakang ngagai perintah sereta pengari rayat dalam ngemansangka sesebengkah menua.
Nya alai, ku iya perambu deka nguchupka agi pemesai sitak dipegai sesiku Penghulu ba sitak Engkilili endang nemban.
Ba pengerami nya, Dr Johnical bisi ngemendarka agih belanja sepenyampau RM260 ribu nengah RTP enggau MRP 2025 iya ungkup Rumah Panjai Sujang.
Agih belanja nya dikena ngemanah agi perengkaguna ba Rumah Panjai Sujang kelimpah dikena ngemujurka perambu JKKK sereta Biro Indu ba rumah panjai nya.-TVS
