ENGKILILI, 22 Dis: Pemutus madamka Parti Sarawak Bersatu (PSB) sebedau tu dikena meri sukung penuh ngagai iring Premier Sarawak, Datuk Patinggi Tan Sri Abang Johari Tun Openg sereta ke pemaik rayat lebih agi ba sitak Kunsil Nengeri (DUN) Engkilili.
Kaban Kunsil Nengeri (ADUN) Engkilili Dr Johnical Rayong Ngipa madah, pemutus nya digaga sepengudah berundingka pemanah atur dipegai Datuk Patinggi Abang Johari Tun Openg dalam meri pengelantang ngagai wilayah tu.
“Ungkup pemaik rayat jemah nyadi kami meri sukung penuh ngagai Premier kitai ungkup pemansang enggau penegap politik di Sarawak.
“Iya (Premier) berani bejaku baka ba dalam diwan aku ngelar iya nyadi Bujang Berani bejaku ke hak kitai di Malaysia.
“Perambu iya chukup manah nyadi nya alai parti PSB dipadam lalu meri sukung penuh ngagai Perintah GPS sampai ke ila-ila,”ku iya.
Iya mansutka jaku nya rambau Pengerami Ngintu Taun Ke-5 Rumah Panjai Sujang Empayau di Semueh Batu 4, ditu kemari.
Ku Dr Johnical, siti pengerugi ngagai rayat nyema sukung enda diberi ngagai siku tuai ke chukup komited sereta ngembuan kuing tuju ke terang dalam ngemansangka Sarawak.
Tandu iya, udah datai maya iya endur muka siti cherita baru ungkup pemansang enggau pengelantang ke meruan di Sarawak nyengkaum di DUN Engkilili.
Kelimpah ari ADUN Engkilili, PSB sebedau tu diarika ADUN Bawang Assan Dato Sri Wong Soon Koh enggau ADUN Ba’Kelalan, Baru Bian.
Parti nya dipadam sepengudah Aum Khas Deligit Parti kena 17 Februari 2024 sereta dikemendarka Opis Pengerijister Gerempung (ROS) kena March 2024.
Diatu ketetiga ex-tuai PSB nya udah diterima masuk Parti Demokratik Progresif (PDP) dibaruh iring Dato Sri Tiong King Sing ke mega siti ari parti komponen Gabungan Parti Sarawak (GPS) ti merintah Sarawak.-TVS
