SIMUNJAN, 22 Dis: Pemujur Parti Pesaka Bumiputera Bersatu (PBB) menang besai rambau Pengawa Bepilih Nengeri Sarawak (PRN) ke-12 suba ukai semina nyadi pengelebih ungkup parti nya numbuhka perintah, taja pan ulih nyapai majoriti mudah.
Taja pia, parti nya sedia bekerejasama enggau semua parti ti sama timpai enggau penemu ke dikemeratka Gabungan Parti Sarawak (GPS) dikena nentuka penegap politik di wilayah tu.
Mandal Presiden PBB, Dato Sri Abdul Karim Rahman Hamza, nyemetak madahka parti PBB nyadi tulang belakang GPS, sereta mujur menang lebih setengah kerusi rambau PRN 202.
“Sapa ke dulu bulih 41 kerusi tauka 41 tambah satu ngambika bulih majoriti mudah, sida udah tau numbuhka perintah.
“Kitai bisi 47, tang enda ulih baka nya aja laban kitai deka semua nemu di Sarawak diuan mayuh pupu bansa.
“Bisi Melayu, bisi Iban, Bidayuh, Dayak ke bukai baka Kelabit. Ba dalam Konstitusyen Sarawak bisi ditulis 34 etnik.
“PBB nyaga sebagi ari bansa nya sereta ke bukai dijaga parti bukai, lalu nya mih kebuah kitai deka bekerejasama,” ku iya.
Iya mansutka jaku nya rambau bejadika program nangguh aum pengari pampang Parti Pesaka Bumiputera Bersatu (PBB) N. 25 Simunjan kemari.
Nangkan ke nya, iya madah sukung enggau penyerakup parti komponen GPS mai Sarawak terus maju ari aspek ekonomi nyentuk ke bisi daya nyendiaka bajet pemadu besai dalam sejarah nengeri tu.
Ba pengerembai ke sama, abdul karim nerangka senentang gps ukai parti ti nyaga siti bansa aja, tang mungkur semua renggat komuniti sereta enda bechiping.
“Parti tu ulih mai penyerakup enggau ulih ngasuh pambar. Enti kitai meda pekara ke nyadi jam diatu di Semenanjung, kelalu mayuh parti politik ke nyaga pemaik orang Melayu, orang Melayu nyau bepechah,” ku iya.-TVS
