SIMUNJAN, 22 Dis: Projek ngaga Kaki Lima Sarawak enggau Waterfont Simunjan ti deka berengkah taun baru iya nya dua bengkah projek pemansang besai ba pelilih tu.
Kaban Kunsil Nengeri (ADUN) Simunjan, Awla Dris madahka kedua-dua projek nya mandangka penyiru Perintah Sarawak dalam menatika pengelantang komuniti nyengkaum di menua pesisir.
Ku terang Awla Dris, kelimpah ari nyadi ranformasyen ngagai tempa tukuh dagang temuai simunjan, pengawa ngemansangka palan pengentap pendiau baru mega deka dipejalaika.
“(Projek) Kaki Lima Sarawak deka digaga dalam taun 2025 ba belakang Sekula Chung Hua.
“Nya siti ari pemansang ke deka datai ngagai Semunjan.
“Pia mega Projek Besai kami ke dikunsika Premier enggau kami iya nya Projek Waterfront.
“Nya udah ditutup kena 18 haribulan lalu 2025 deka berengkah dipejalaika.
“Berita manah ngagai peranak Semunjan, ke alai kami udah minta tanah ba belakang semak Kampung Sagu, tanah estet deka diambi dikena ngaga skim pengentap baru lalu nya udah udah dikemendarka lebih sebulan,” ku iya.
Awla madah munyi nya rambau Aum Deligit Pampang Parti Pesaka Bumiputera Bersatu (PBB) N.25 Simunjan, kemari.
Ba awakka sama, iya madahka jalai alun baru mega udah digaga ba sekeda kandang menua nyengkaum sekeda genturung pendiau enggau jalai ari Sepital Simunjan nuju ke Merunduk.-TVS
