SEBUYAU, 22 Dis: Penanggul teknikal ngaul empat unit ba Tekat Ai Bakun udah dikelala nyadi kebuah bekal karan tejanggal ba sekeda mengeri besai di Sarawak nyengkaum di Kuching, Sibu, Bintulu, enggau Miri.
Menteri Utiliti enggau Telekomunikasyen Sarawak, Dato Sri Julaihi Narawi madahka Sarawak Energy Berhad (SEB) benung mansik kebuah penanggul nya tau nyadi, seraya nentuka bekal karan dikemanahka baru sechara berenggat.
“Nengah ripot ari Tuai Pegawai Operasyen SEB James Ung, aku dipadahka sida benung bejalaika pengawa mulaika baru bekal kuasa karan.
“Berebak enggau nya, sida benung mansik kebuah ke bendar penanggul tu, lalu kami nganti penerang ke silik agi ari SEB,” ku iya rambau aum media senjinjik bejadika Aum Pengari Parti Pesaka Bumiputera Bersatu (PBB) Pampang Sebuyau di Dewan Pembangunan Sebuyau, kemari.
Julaihi nerangka , penanggul bekal karan nya ngirauka ati perayat, kelebih agi enggau ripot ti dikerembaika ba media rama bekaul penanggul bekal karan ba sekeda kandang endur.
Nengah sebengkah penerang ba Facebook, SEB ngesahka semua kandang endur ke napi penanggul nya udah bisi karan penuh naka pukul 3 lemai kemari.
Nangkan ke nya, penguna ke agi bisi napi penanggul karan dipinta ngeripot pekara nya sechara dalam tali tarus,1-300-88-3111 tauka nengah aplikasyen SEB Cares.-TVS
