SELANGAU, 21 Dis: Kaban Parlimen Selangau, Edwin Banta ngelalau semua renggat komuniti lokal di Selangau bela besaup nagang enggau munaska isu salah nguna dadah di sitak nya.
Ku iya madah, semua orang sekalika tuai komuniti enggau tuai raban bansa (KMKK), nembiak sereta pengani ba sesebengkah rumah panjai mesti menatika senentang pekara nya ngambika enda majak nyadi.
Nengah penerang ti dikunsi nengah laman Facebook, Edwin madahka bisi 200 iku Tuai Komuniti Enggau Tuai Raban Bansa (KMKK) ngulu Program Randau OSC Mids Begulai Enggau Komuniti Selangau ke diatur ba Rumah Tamat, Nanga Tabau, Batu Putih, Jalai Oya empai lama.
“Semua perayat di Selangau mesti bisi pemereti senentang badi, tauka penusah ke tau nyadi ketegal salah nguna dadah,”ku iya.
Iya nerangka, rambau program nya diatur, mayuh macham ejensi perintah bisi datai meri penerang pasal salah nguna dadah ngagai komuniti baka Ejensi Anti Dadah Menua (AADK) bagi menua Sibu, Opis Tasat Jenayah Narkotik ari IPD Dalat, Opis Pengerai Bagi Menua Sibu sereta Opis Pengintu Pengelantang Bagi Menua Sibu.
Ba dalam program ke sama, iya bisi nyerahka bantu pelajar ngagai 10 iku siswa ti deka nampung pelajar ba renggat universiti perintah (IPTA).
“Insiatif nya diberi ngagai siswa sechara ‘one-off’ ti mujur nampung pelajar sida ke renggat universiti,” ku iya.
Kelimpah ari nya, Edwin mega bisi nyuaka bantu Projek Mit Menua Pesisir (MRP) ngagai empat Komiti Pemansang Enggau Pengelikun Genturung Pendiau (JKKK), Gerempung Pengajar Enggau Apai Indai (PIBG) Sekula Primari SK Batu 36 Tamin sereta Opis Pelilih Selangau sepenyampau RM25,000.
Tuju bantu nya diberi dikena meri kus ti tau mantu negapka tangkup pengawa KMKK pelilih Selangau.-TVS