KUCHING, 21 Dis: Sarawak deka berengkah ngiga atlit baru dikena nentuka pemujur kontinjen wilayah tu dalam Lumba Para Malaysia (SUKMA) Ke-22 ti deka diatur di Selangor 2026.
Sapit Menteri Pemansang Orang Indu, Nembiak Mit Enggau Pengelantang Komuniti Sarawak, Datuk Mohammad Razi Sitam madahka, pengawa ngiga atlit baru tu deka berengkah pun bulan Februari taun baru ti ngemeratka pengawa ngelatih atlit ke bisi penau ngetanka gelar champion Sarawak ungkup kali ke-15.
“Dikena ngenegap sereta ngemanahka agi tikas pemujur kontinjen Para Sarawak napi Lumba Para SUKMA Ke-22 di Selangor 2026.
“Kitai deka nyikap atlit tumu nengah meri pengeludas enggau latih ti engkeman dalam misyen nyadi champion ke-15,” ku iya.
Ba Lumba Para SUKMA ke diatur bulan September tu tadi, kontinjen Sarawak udah mujur bulih 82 midul emas, 53 midul pirak, enggau 74 midul engkeraju lalu penyampau semua midul nya bisi 209 iti.
Bekau ari nya ngujungka sarawak ngerampas baru gelar champion penuh ari Sabah ungkup kali ke-14.
“Sarawak udah nyadi chunto dikena ngatur lumba Para di Malaysia, kelebih agi ari sukut perambu ti silik perintah nengeri.
“Kelimpah ari nya pengaga ati mega nuju ngagai atlit ke mujur mechahka rikod pekit ba pekit sida empu nyerumba lumba tu, lalu tu nyata ngayanka semangat ngangkam ke tinggi ba atlit dikena napi pemar ke ditapi, kelebih agi raban Orang Nyelai Pendiau (OKU),” ku iya.
Rambau pengerami nya, tanda basa mega bisi diberi ngagai pengereja pengawa opis pengintu pengelantang komuniti ke deka pinchin dikena meri basa ngagai pemeri sida sepemanjai servis .
Sama bisi datai Direktor Opis Pengintu Pengelantang Komuniti Sarawak (JKMS) , Semawi Mohamad enggau Direktor Opis Nembiak Enggau Lumba (JBS) Sarawak, Lamat Nyalau sereta ke bukai.-TVS
