ENGKILILI, 21 Dis: Pengawa nyidi enggau mantu (SAR) siku orang tuai ke dipelaba lenyau ba Pais Skrang Engkilili kenyau Hari Tiga tu tadi ditampung baru masuk hari ketiga sehari tu.
Pemangku Tuai Balai Bomba enggau Penyah Penusah (BBP) Betong, Pegawai Bomba Kanan Satu Jusmadie Jamaie madah, operasi SAR sehari tu dibantu unit Ukui Penyidi K9 Opis Bomba enggau Penyah Penusah Malaysia Sarawak.
“Operasi SAR nyidi tudah ke dipelaba lenyau di Pais masuk hari ketiga ditampung baru lalu kandang endur begiga agi numpu ngagai palan kepenudi radius lalu dikerembaika agi ngagai 4.5 Kilometer sereta dibantu unit K9 Opis Bomba enggau Penyah Penusah Nengeri Sarawak,” ku iya.
Iya mansutka penerang nya maya dirandau TVS pagi tu tadi.
Ku iya, operasyen SAR hari ketiga mega dibantu raban PDRM, Raban Penyaga Orang Periman (APAM) enggau peranak rumah panjai.
Tandu iya, pengawa sida ngiga tudah ke lenyau bisi napi pemar mimit beduduk hari gaya hari suah ujan sereta arus sungai ke balat deras.
Tudah ke lenyau iya nya Jijah Sanggah, 66 taun dipelaba lenyau sepengudah nurun ke kebun urung 700 meter penyauh ari rumah panjai.
Ripot pengelenyau tudah digaga sida sebilik ba Balai Polis Skrang.-TVS
