DEBAK, 20 Dis: Nembiak Sekula Sekondari (SMK) Saribas ke nyulut tauka bulih Gred A dalam semua subjek ba Peresa Sijil Pelajaran Malaysia (SPM) deka diberi insentif RM1,000 siku berengkah taun baru.
Maya mansutka jaku semaya nya, Sapit Menteri Pemansang Indu, Nembiak Mit Enggau Pengelantang Komuniti Sarawak, Datuk Mohd Razi Sitam madahka, tuju meri insentif nya laban deka meri peransang ngagai nembiak SMK Saribas sereta nentuka sekula nya bisi daya besemekih enggau sekula bukai di kandang menua pesisir.
“Kitai di SMK Saribas tu enda suah bulih semua, enti bisi pan siku dua aja, sereta ngarapka udah tu lebih mayuh nembiak bulih semua A.
“Tu mega ngambika ulih nambahka status SMK Saribas nyadi sebuah sekula ba menua pesisir ke sama tikas enggau sekula elit bukai di mengeri baka SMK Sacred Heart Sibu ti tampak nama ketegal suah bulih pemutus ke manah, kolej, sekula sains sereta ke bukai,” ku iya.
Razi ke mega Kaban Kunsil Nengeri (ADUN) Saribas mansutka penemu nya maya Pengerami Aksari Anugerah Penyulut Saribas 2024 diatur ba Dewan Perpaduan Debak, kemari.
Beduduk ari nya, iya ke mega , nerangka perambu nambahka penyampau insentif nya sebagi ari langkah rapat dikena meransang mayuh agi nembiak bekenanas ngulihka pemutus peresa ke manah, sereta naga kurang lebih 10 iku nembiak nerima insentif nya ninting taun.-TVS
