ENGKILILI, 20 Dis: Pengawa ngatur program licha pengelikun angus deka terus ditegap ba sitak dibaruh jaga Opis Bomba enggau Penyah Penusah Malaysia (JBPM) Zon Tiga Sri Aman.
Tuai JBPM Zon Tiga Sri Aman, Penguasa Bomba (PgB) Muhammad Rais Adham Rosalan madah, pekara nya pengudah beratika pengasi program ke diatur ungkup komuniti sereta mujur ngurangka penyampau kes angus taun tu.
“Program baka tu kitai deka negapka agi ba taun 2025 iya nya kitai berundingka statistik ba taun tu iya nya 106 kangau emejensi ngaul angus udah dirikodka lalu kitai mujur ngurangka urung 19 kes tauka 16.75 peratus dibanding kes taun 2023 ke ngerikod 127 ((kes).
Iya mansutka jaku nya rambau dirandau media pengudah tembu Program Kimpin Pengelikun Angus ‘Fire Point’ ba Rumah Panjai Alau Abik di Bua, Engkilili empai lama.
Ku iya, JBPM Zon Tiga udah mujur nyelamatka reta tengkira dianggarka berega RM6.9 juta sepanjai taun 2024.
Dulu ari nya bisi 87 penyereta ari 13 buah rumah panjai ke besemak bisi ngambi bagi ngulu program nya nyengkaum sida ari Bua, Merbong Asal, Merbong Baru, Entulang, Sungai Menuang, Danau, Selindong, Bukong enggau ke bukai.
Tuju program nya dikena narak pemereti ati pengani ba rumah panjai bekaul enggau atur nyaga pengelikun angus, numbuhka tim komuniti maya bisi penusah angus enggau nyadi pelasar pemadu manah endur opis bomba bekunsi penerang ke beguna ngagai mensia mayuh.-TVS
