SARATOK, 20 Dis: Penumbuh Opis Menteri Pelajar, Inovasyen enggau Pemansang Bakat (MEITD) Sarawak bukti komitmen tinggi Perintah Sarawak dalam negapka bidang pelajar ba wilayah tu.
Sapit Menteri Pelajar, Inovasyen enggau Pemansang Bakat Sarawak, Datuk Dr Annuar Rapaee madah, laban nyadi sebuah perintah ke ngempu tanggungpengawa sereta seruran ngemeratka bidang pelajar dia perintah nengeri naka ulih nyaup tajapan tanggungpengawa pugu nya dipegai perintah besai.
“Kitai nemu dalam kunstitusyen nyebut tanggungpengawa, reti nya ti mansutka belanja dikena ngatur pekara pelajar endang dipegai Perintah Besai.
“Tang ba Sarawak kitai enda ulih enda champur jari dikena nentuka pekara pelajar ba nengeri tu enda tinggal.
“Beduduk ari nya, ba taun 2017 ditumbuh opis menteri ba nengeri tu lalu aku dipadu nyadi sapit menteri lalu naka tu opis menteri tu udah mandangka pengeransing bekaul enggau pekara pelajar,” ku iya.
Dr Annuar mansutka jaku nya maa bejadika Pengerami Ngintu Taun Ke-100 Sekula Primari (SK) Abang Abdul Rahman Saratok, ditu empai lama.
Ku iya mayuh inisiatif udah dipejalaika Perintah Sarawak nengah Opis Menteri Pelajar, Inovasyen enggau Pemansang Bakat Sarawak kenyau iya udah ditumbuh.
Tandu iya, pengawa meri puku sepenyampau RM1 bilion ari Peribtah Sarawak ngagai Perintah Besai dikena ngemanah sekula repuk ba nengeri tu mega siti ari bukti mayuh sekula repuk ba menua pesisir udah tembu dikemanah.-TVS
Sama bisi datai Kaban Kunsil Nengeri (ADUN) Kalaka Mohd Duri, ADUN Krian Friday Belik, ADUN Kabong Dato Mohd Chee Kadir enggau ke bukai.-TVS
