ENGKILILI, 20 Dis: Operasyen Nyidi enggau Mantu (SAR) masuk hari kedua siku orang tuai ke dipelaba lenyau ba Pais Skrang ditu ditangguh beduduk ari ujan bangat sereta arus sungai ti kelalu deras.
Pemangku Tuai Balai Bomba enggau Penyah Penusah (JBPM) Betong Pegawai Bomba Kanan Satu, Jusmadie Jamaie madah, operasyen SAR nya deka disambung baru pagila.
“Operasyen SAR nyidi enggau mantu tudah ke dipelaba lenyau di Pais Skrang ditangguh ba hari kedua lalu sehari tu tadi lebih numpu begiga ba kandang endur kepenudi tudah ke dipelaba lenyau iya nya urung radius 3.5 Kilometer kelimpah ngiga ba Sungai Skrang ngena bot. Operasyen deka disambung baru pagila ungkup pengawa nyidi,” ku iya.
Iya mansutka penerang nya sepengudah nangguhka Operasyen SAR ba hari kedua bekaul enggau pengawa ngiga siku orang tuai ke dpelaba lenyau ba Pais, Skrang sehari tu tadi.
Ku iya, SAR nya dipejalaika ngaul lapan iku kaban bomba diuluka Pegawai Bomba Kanan Satu, Abang Muhd Fhazil.
Tandu iya, pengawa SAR nya mega disaup raban polis sereta Raban Penyaga Orang Periman (APAM) sereta urung 30 iku peranak rumah panjai.
Dulu agi ari nya, operasyen SAR ngiga siku orang tuai ke dikangau nama Jijah Sanggah, 66 taun ke dipelaba lenyau sepengudah nerima ripot pasal kes ba Balai Polis Skrang.
Tudah diperitaka lenyau sepengudah nurun ke kebun ti bepalan urung 700 meter penyauh ari rumah panjai.
Sama bisi datai ngemataka pengawa SAR tu iya nya Tuai JBPM Zon 3 Sri Aman, Penguasa Bomba (Pgb) Muhammad Rais Adham Rosalan.-TVS
