DEBAK, 20 Dis: Bala apai indai enggau pengajar ngesan tangkup pengawa ke chukup beguna dalam nerenak pengerindu nembiak sekula ngaul diri dalam Bidang Sains, Teknologi, Injiniring enggau Matematik (STEM).
Kaban Parlimen Betong, Dato Dr Richard Rapu nyemetak madahka, pasal pemesai guna kedua-dua raban nya ngiga chara pemadu manah ti tau matak pengerindu nembiak belajar sereta nyeranggap bidang STEM, senutuk enggau aspirasyen tauka juluk perintah.
“Nya alai, endang beguna amat kitai ke nyadi apai indai enggau pengajar mantu matak pengerindu nembiak, bala anak belajar pasal pekara STEM tu.
“Kitai mesti bisi pemereti tumu baka ni deka nerenak pengerindu sida seraya nentuka mayuh agi nembiak rindu belajar senentang bidang sains enggau matematik.
“Nya mih entara pemar ke ditapi kitai, laban ba pengidup jemah kitai sigi begunaka lebih mayuh raban pengereja ti bisi pengelandik STEM,” ku iya.
Dr Richard mansutka penemu nya maya Pengerami Aksari Anugerah Penyulut Saribas 2024 diatur ba Dewan Perpaduan Debak, kemari.
Udah nya, ku iya sistem pelajar mega mesti dinamik sereta progresif, kelimpah mekuhka program pengelandik ti ulih dikena manah nembiak sereta ngadaka raban pengereja ti sikar, enggau bekualiti.
Tandu iya, apai indai enggau pengajar mesti nengkira diri napi ubah sereta pekara baru dalam sistem pelajar dikena nentuka agenda sereta juluk pemansang sarawak dalam bidang STEM ulih dijapai jemah.-TVS
