MIRI, 20 Dis: Dua iku bebadi nyawa ba penusah aksiden ke nyadi ba jalai Pan Borneo Bintulu-Miri tumu pagi tadi ke ngaul sebuah lori kargo enggau treler ke benung paking ba tisi jalai.
Ba penusah nya tusah ke babadi nyawa iya nya deriba lori kargo, Bonaventure Jimmat,31, enggau pemantu deriba, Keeshen Marks Donald Bujang Nasil,26.
Pengari Palan Penyah Operasyen (PGO) Opis Bomba enggau Penyah Penusah Malaysia (JBPM) Sarawak madah, raban sida nerima kangau bekaul enggau penusah nya pukul 2.37 pagi lalu terus nganjung lima iku kaban ari Balai Bomba enggau Penyah Penusah (BBP) Batu Niah ngesah palan penusah.
“Kededua tudah lelaki tekepit ba penuduk luan lori kargo nya.
“Kaban bomba ngena kereban Road Traffic Accident (RTA) mansutka tudah,” ku iya nengah sebengkah penerang sehari tu tadi.
Ku iya, sepengudah mujur dipansut kededua tudah nya diaku staf Opis Menteri Pengerai Malaysia (KKM) bela udah nadai ba palan penusah nyadi.
“Seduai bela udah diserah ngagai raban polis ungkup atur ke bekaul.
“Sepengudah nentuka palan nya likun sereta nadai agi lichin enggau diperesi dia raban bomba mupuk mulaika diri baru ngagai balai,” ku iya.-TVS
