MIRI, 16 Dis: Perintah Sarawak komited nentuka komuniti ba kandang menua pesisir sama ngasaika pemansang teknologi moden, nyengkaum digitalisayen sereta e-dagang, ti sebagi ari pengawa deka ngerapitka seraka digital entara mengeri enggau menua pesisir sereta ngemansangka ekonomi komuniti ba endur nya.
Menteri Dagang Temuai, Industri Kreatif Enggau Seni Pemerindang Sarawak, Dato Sri Abdul Karim Rahman Hamzah madahka, teknologi moden beguna amat dalam jeman digital sereta sebagi ari perambu timpuh panjai wilayah tu.
“Endang nya siti ari pekara ti mesti dipejalaika kitai. Ukai semina nengah opis menteri aku tang nengah opis menteri ke bukai, ti nyaga pasal dagang, ke nyaga bekaul enggau digitalisasyen.
“Juluk perintah iya nya deka selampur Sarawak nguna sekalika sida dalam mengeri tauka jauh ba garis entara menua ba kandang menua pesisir, ngambika sida semua disikap manah enggau teknologi baru ke endang diguna,”ku iya.
Abdul Karim mansutka jaku nya rambau Pengerami Bejadika Mysed Go Rural 5.0 2024 di Long Seridan, kemari.
Kelimpah ari nya, iya mega ngemeratka senentang pemesai guna ngatur program aum begulai dikena meratika pemar enggau isu ti ditapi komuniti lokal.
“Nya alai, penyereta ari raban nembiak, penyereta enggau raban tuai komuniti ngambika sida mega nemu senentang ubah ke nyadi dalam dunya tu.
“E-dagang, semua tu patut dipelajar enti kitai deka mansang,” ku tandu iya. -TVS
