ROBAN, 16 Dis: Pengawa ngatur sesebengkah pengerami endang pantar nempa penyerakup enggau meri empas positif ngagai pengelantang komuniti pupu bansa di Sarawak, ku Datuk Rosey Yunus.
Sapit Menteri Pemansang Indu, Anak Mit enggau Pengelantang Komuniti Sarawak nya madah, Pengerami Pemakai Roban (RFF) 2024 endang siti pengerami ke deka meri empas manah ngagai semua rayat enda ngira tikas umur.
“Iya ke (pemadu) beguna ditu iya nya pengatur. Ambika chunto program tu manah nyadi orang luar pan datai enggau peranak lokal ditu nyadi nya deka nempa penyerakup enggau pangan diri.
“Nya alai, kitai chukup meransang (ngatur) program tu laban ukai semina dilawa orang luar tang mega komuniti lokal empu awakka sida lebih ngelala pangan diri, pasal menua diri enggau mega main asal diri empu.
“Nya kebuah, kitai madah (pengerami) nya siti ari program ke ulih narak penyerakup dalam komuniti lebih agi di Sarawak,” ku iya.
Rosey madah munyi nya pengudah bejadika Pengerami Pemakai Roban (RFF) 2024 diatur ba Pasar Roban, empai lama.
Ku iya pengawa ngatur pengerami pemakai endang pantar pemadu manah ungkup komuniti lokal nambahka sosio ekonomi diri empu.
Nya alai, ku Rosey pengerami nya patut diteruska sereta diatur manah agi dudi hari.-TVS
