ENGKILILI, 16 Dis: Agih belanja penyampau RM150,000 udah dikemendarka dikena ngaga diwan mayuh guna ke baru ba Rumah Alau Abik di Bua ditu.
Kaban Kunsil Nengeri (ADUN) Engkilili Dr Johnical Rayong Ngipa madah projek nya udah dikemendarka ba baruh Projek Transformasyen Menua Pesisir (RTP) bagi taun 2025.
“Enti nitihka ba taun tu laban udah ujung taun, nangika ejensi pengatur enda ulih bejalaika tangkup pengawa, nyadi aku mai ngagai taun baru, enda lama agi.
“Tu bulan Disember, udah 2025 nyadi aku ngemendarka ungkup ngaga diwan kita sechara beripai entara perayat rumah panjai tu empu tauka kita ulih nyiri raban kunteriktor tu.
“Aku enggai muka tinda, enti ditinda, duit enda chukup, nyadi aku ngemendarka RM150, 000 ungkup ngaga diwan ba Rumah Panjai Bua tu,” ku iya.
Rayong mansutka jaku nya rambau ngemujurka pengawa nutup Program Kimpin Pengelikun Angus ba Rumah Alau Abik di Bua ditu, kemari.
Kelimpah ari nya, Rayong ngelalau rayat ba pelilih Engkilili ngambika terus beserakup dikena negapka Gabungan Parti Sarawak (GPS) ba kandang endur nya.
Iya mega mesan rayat anang mudah tekuing runding enggau berita sebubu ngapa ti ngerembaika petenah ngumbai iya ukai pengari rayat GPS.
Ku terang iya, berita ke munyi nya enda betul sereta ngembuan niat ti sengaja nyaru ke penemu rayat ba kandang endur nya, ungkup modal politik sida.
Taja pia, iya madah diri deka terus komited dalam mai pemansang ba konstituensi nya ungkup pengelantang rayat Engkilili seriris enggau agenda pemansang perintah Sarawak.-TVS
